මහ බැංකු මූල්‍ය වංචාවට සහාය වූ නිලධාරීන් රට හදන්න සහාය නොදීම ගැන ජනපත්ගේ දැඩි අප්‍රසාදය

මහ බැංකු මූල්‍ය වංචාව සිදුවූ කාලයේ සිටි නිලධාරීන් තවමත් සිය තනතුරු හොබවන බවත් එම මහා වංචාවට සහාය වූ ඔවුන් රට හදන්න සහය නොදීම ගැන තම අප්‍රසාදය පළ කරන බවත් ජනාධිපති ගෝඨාභය රාජපක්ෂ මහතා ඊයේ (16 ) මහ බැංකුවේ ඉහළ නිලධාරීන්ට ඉතා දැඩිව කියා සිටියේය.


‘ වැටුණු ආර්ථිකය ගොඩනැගීමේ වගකීම පැහැර හරින්න එපා , නිවැරදි උපාය
කුමක්දැයි මට කියන්න’යැයි ද ජනපතිවරයා මහ බැංකු ප්‍රධානීන්ට කීවේය.

“රට ගොදුරු වී ඇති සෞඛ්‍ය අර්බුදය ආර්ථික අර්බුදයක් බවට පත්වීමට ඉඩ දෙන්නබැහැ. අප මුහුණ පා ඇත්තේ ගෝලීය අර්බුදයකට. වැටුණු ආර්ථිකය ගොඩගැනීමට ඉවහල්වන
මූල්‍ය සහ ෆිස්කල් ප්‍රතිපත්ති සම්පාදනයේ වගකීම ඇත්තේ මහ බැංකුවට සහ
භාණ්ඩාගාරයට. ලොව ලොකු, කුඩා රටවල මහ බැංකු අර්බුදය ජය ගැනීමට මෙවලම් සමූහයක් හඳුන්වාදී තිබෙනවා. අපේ මහ බැංකුවෙන් එවැනි යහපත් ප්‍රතිචාරයක් නැහැ. අර්බුදය ජය ගැනීමට කළයුතු දේ කිසිදු ප්‍රමාදයකින් තොරව මට දැනුම් දෙන්න යයි ද ජනාධිපති ගෝඨාභය රාජපක්ෂ මහතා මහ බැංකුවේ ප්‍රධානීන් අමතමින් කියා සිටියේය.

ආර්ථික පුනර්ජීවනය සඳහා රජය සිය යෝජනා ඉදිරිපත් කර තිබේ. ඊට මහ බැංකුවේ සහාය මෙතෙක් ලැබී නැත. එසේ කිරීමට හේතුව කුමක්දැයි පැහැදිළි කරන්නැයි ජනාධිපතිතුමා ඔවුන්ට දැනුම් දුන්නේය.

ශ්‍රී ලංකා මහ බැංකුවේ අධිපති මහාචාර්ය ඩබ් ඩී ලක්ෂ්මන් මහතා ප්‍රමුඛ ජ්‍යෙෂ්ඨ නිලධාරීන් සමග ඊයේ (16) පෙරවරුවේ ජනාධිපති කාර්යාලයේ පැවති සාකච්ඡාවේදී ජනාධිපතිතුමා මේ අවවාදාත්මක ප්‍රකාශය කළේය.

ඇමරිකාව, ජපානය සහ ඕස්ට්‍රේලියාව ඇතුළු ලෝකයේ ප්‍රධාන පෙළේ රටවල මෙන්ම කුඩා රටවලද මහබැංකු ආර්ථිකය ගොඩනැගීමට අවශ්‍ය ක්‍රමවේද ඉදිරිපත් කර තිබේ. එහෙත්මෙරට මහබැංකුව ආර්ථික පුනරුත්ථාපනය
සඳහා කිසිදු යෝජනාවක් ඉදිරිපත් කර නැත. පසුගිය වසර කිහිපය තුළ ආයතන රැසකට ඔවුන් සැපයූ සේවා සහ නිෂ්පාදන වෙනුවෙන් රජය
විශාල මුදල් ප්‍රමාණයක් ගෙවිය යුතුව ඇත. ඒවා ඇපකර ලෙස තබාගෙන රුපියල් බිලියන 150ක් මූල්‍ය ප්‍රතිපාදන බැංකු වෙත ලබාදීමට ජනාධිපතිතුමා කළ යෝජනාව මහබැංකුව පැහැර හැර තිබේ. මේ නිසා සිදුවන ආර්ථික පසුබැස්ම පිළිබඳ චෝදනාව රජය මත පැටවෙන
බව ජනාධිපතිතුමා කීය.

මහබැංකු මූල්‍ය වංචාව සිදුවූ කාලයේ සිටි නිලධාරීහූ තවමත් සිය තනතුරු හොබවති. ඒ මහා වංචාවට සහාය වූ ඔවුන් රට හදන්න සහය නොදීම ගැන ජනාධිපතිතුමා සිය අප්‍රසාදය පළ කළේය. ජනතාව තමාට අතිවිශාල ජනවරමක් දී ඇත්තේ රට වෙනුවෙන් බව පෙන්වා දෙන ජනාධිපතිතුමා එය ඉටුකිරීමට බැඳී සිටින බව අවධාරණය කළේය. සෞඛ්‍ය, ආරක්ෂක සහ
බුද්ධි අංශ එක්ව කොවිඩ් වසංගතයෙන් රට බේරා ගැනීමට විශාල කැපකිරීමක් කළහ. රට ආර්ථිකමය වශයෙන් ගොඩනැගීමේ කාර්යභාරය මහබැංකුව වෙත පැවරී තිබේ. එය ඉටුකරනු වෙනුවට මහබැංකුව තම යෝජනාවලටද අවහිර කර ඇති බව ජනාධිපතිතුමා කීය.
ගැටළුව අවබෝධකරගෙන ඉතා ඉක්මණින් මහ බැංකුවේ යෝජනා හෝ තම යෝජනාවට අනුමැතිය හෝ දෙන්නැයි ජනාධිපතිතුමා නිලධාරීන්ට දැනුම් දුන්නේය. එය අදම කළයුතු බවද එතුමා අවධාරණය කළේය.

ජනාධිපති ලේකම් පී.බී. ජයසුන්දර, ජනාධිපති ප්‍රධාන උපදේශක ලලිත් වීරතුංග,මුදල් අමාත්‍යාංශයේ ලේකම් එස්.ආර්. ආටිගල, මහබැංකුවේ අධිපති මහාචාර්ය ඩබ්ලිව්.ඩී. ලක්ෂ්මන් යන මහත්වරු සහ මහ බැංකු නිලධාරීහූ සාකච්ඡාවට එක්ව සිටියහ.




Views
192
2020-06-16 16:41:50