එන්ටර්ප්‍රයිස් ශ්‍රී ලංකා ප්‍රදර්ශනය ජූලි 24 සිට 27 දක්වා අනුරාධපුරයේ දී
ශ්‍රී ලංකාව තුළ ව්‍යවසායකත්වය ප්‍රවර්ධනය කිරීම සහ රජයේ සංවර්ධන කාර්යයන් ජනතාවට වඩාත් සමීප කරවීම අරමුණු කරගත් එන්ටප්‍රයිස් ශ්‍රී ලංකා ප්‍රදර්ශන මාලාවේ දෙවැනි ප්‍රදර්ශනය ජූලි මස 24 සිට 27 දක්වා අනුරාධපුර වලිසිංහ හරිස්චන්ද්‍ර ක්‍රීඩා පිටියේ දී පැවැත්වේ.

මුදල් අමාත්‍යාංශය විසින් සංවිධානය කරනු ලබන මෙහි දී රාජ්‍ය ආයතන හා බැංකු වෙතින් ව්‍යවසායකයන් සඳහා අවශ්‍ය සේවාවන් ලබා ගත හැකි වේ. එමෙන් ම ව්‍යවසායකත්වය පිළිබඳ උපදෙස්, මගපෙන්වීම් සහ පුහුණු අවස්ථාවන් ද මෙහි දී සැපයෙන බව මුදල් අමාත්‍යාංශය කියයි.

ව්‍යවසායකත්ව අපේක්ෂාවන් සහිත ප්‍රදේශයේ තරුණ තරුණියන් ඉලක්ක කරගනිමින් ඔවුන්ට අවශ්‍ය සේවා පහසුවෙන් ලබා ගත හැකි පරිදි මෙම ප්‍රදර්ශනය ව්‍යවසායකත්ව කලාපය, රාජ්‍ය හා පෞද්ගලික අංශ කලාපය, අධ්‍යාපන කලාපය, හරිත කලාපය, නව නිපැයුම් කලාපය, වාණිජ කලාපය සහ මාධ්‍ය කලාපය ලෙස කලාප හතකට වෙන් කර ඇත. ව්‍යවසායකත්ව කලාපය මගින් ඔවුන්ට සිය ව්‍යාවසායකත්ව අපේක්ෂාව ව්‍යාපාරයක් බවට පත් කර ගැනීම සඳහා වන උපදේශකත්වයන්ගේ සිට එය ආරම්භ කිරීම සඳහා පොලී සහන ණය ලබා ගැනීම සඳහා සුදුසුකම් ලබා ගැනීම දක්වා වන සියලු කටයුතු එකම ස්ථානයක දී සිදු කර ගැනීමේ හැකියාව පවතී. මේ සඳහා මුදල් අමාත්‍යාංශයේ එන්ටප්‍රයිස් ශ්‍රී ලංකා ලේකම් කාර්යාලයේ නිලධාරීන් මෙන් ම ශ්‍රී ලංකාවේ සියලුම රාජ්‍ය සහ පෞද්ගලික බැංකුවල එන්ටප්‍රයිස් ශ්‍රී ලංකා ණය යෝජනා ක්‍රමය සම්බන්ධයෙන් කටයුතු කරන නිලධාරීන්ගේ ද දායකත්වය ලැබේ. අදාළ බැංකු වෙතින් ඒ මොහොතේම ණය මුදලක් ලබා ගැනීම සඳහා ලියාපදිංචි වීමේ හැකියාව ද පවතින බවද එම අමාත්‍යාංශය කියයි.

රාජ්‍ය හා පෞද්ගලික අංශ කලාප මගින් විශේෂයෙන්ම මෙරට රාජ්‍ය සහ පෞද්ගලික අංශයේ ආයතන පිළිබඳ සහ ඒවායේ කාර්යයන් පිළිබඳ අවබෝධය ලබා දෙනු ලබයි. රජයේ සංවර්ධන කටයුතු පිළිබඳ තොරතුරු, ඒ ඒ අමාත්‍යාංශවල කාර්යභාරයන් සහ එමගින් එම ජනතාවට සැලසෙන සේවාවන් පිළිබඳ තොරතුරු මෙහි දී ලබා ගත හැකි ය. ප්‍රදර්ශන භූමියට පැමිණෙන ලක්ෂ සංඛ්‍යාත පාසල් සහ උසස් අධ්‍යාපනය හදාරන සිසුන් වෙනුවෙන් අධ්‍යාපන කලාපය වෙන් කර ඇත. අධ්‍යාපන අමාත්‍යාංශය මැදිහත්ව පාසල් විෂයානුබද්ධ කටයුතුවලට අදාළ පොත්පත් විශේෂ වට්ටම් සහිතව මෙහි දී අලෙවි කෙරේ. මීට අමතරව සිසුන් අවශ්‍ය දැනුම ලබා ගැනීම සඳහා වන විවිධ වැඩසටහන් මෙම ප්‍රදර්ශන කලාපය තුළ දී පැවැත්වේ. උසස් අධ්‍යාපන වරම් පිළිබඳ මගපෙන්වීම් ද මෙහි දී ලබා ගත හැකි ය.

මෙම ප්‍රදර්ශනය නැරැඹීමට එන අයට පහසු මිලට භාණ්ඩ මිල දී ගැනීමේ අවස්ථාව ද හිමිවේ. විශේෂයෙන් ම ශ්‍රී ලංකා ආයෝජන මණ්ඩලය යටතේ ඇති කර්මාන්ත ශාලා නිමි ඇඳුම් හා ඇගලුම් තීරු බදු රහිත මිල ගණන්වලට මෙහි දී මිල දී ගත හැකි ය. මෙයට අමතරව නව නිපැයුම්කරුවන් වෙනුවෙන් වෙනම කලාපයක් වෙන් කර තිබේ. සම්මාන ලාභී නව නිපැයුම්කරුවන් සහ උතුරු මැද පළාතේ නව නිපැයුම්කරුවන්ට මෙහි දී විශේෂත්වයක් හිමිවේ.

මෙයට අමතරව රාජ්‍ය ආයතන මගින් පවත්වනු ලබන ජංගම සේවා රැසක් ද ප්‍රදර්ශනය පවත්වනු ලබන දින හතර පුරාම ක්‍රියාත්මකය. සෞඛ්‍ය අමාත්‍යාංශය සහ පළාත් සෞඛ්‍ය සේවා දෙපාර්තමේන්තුව එක්ව සංවිධානය කරනු ලබන සායන සේවා සහ රසායනාගාර සේවාවන් ජනතාවට නොමිලේ ලබා ගත හැකියඑසේම අග්‍රමාත්‍යවරයා යටතේ පවතින ජාතික ප්‍රතිපත්ති අමාත්‍යාංශය යටතේ කුඩා ව්‍යාපාර ආරම්භ කිරීම සඳහා උපදෙස් සහ අවශ්‍ය පහසුකම් සැලසීම ද සිදු කෙරේ.

Views
174
2019-07-16 02:51:23
ව්‍යාපාර පුවත්
ජනප්‍රිය පුවත්