දුම්කොළ සමාගමේ නීති විරෝධී වැඩක් සුව ඇමැති හෙළී කරයි





දුම්කොළ සමාගම් නීති විරෝධි සිගරට් ගෙන්වා එම සිගරට් භාවිතය වැඩි වන බවට රට තුල ජනමතයක් ඇති කිරිමට උත්සාහ කරන බවට සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා චෝදනා කරයි.

මහාචාර්ය සේනක බිබිලේ ඖෂධ ප්‍රතිපත්තියට අනුව ශ්‍රී ලංකාවට අවශ්‍ය ඖෂධ මෙරටදීම නිෂ්පාදනය කිරීමේ අරමුණින් හොරණ බැල්ලපිටිය ප්‍රදේශයේ ඉදි කළ හයවන ඖෂධ හා සුවඳවිලවුන් කර්මාන්ත ශාලාවේ ප්‍රථම අදියරේ ඖෂධ නිෂ්පාදනය ආරම්භ කිරීම පෙරවරුවේ ආරම්භ කරමින් අද (20) අමාත්‍ය දොස්තර රාජිත සේනාරත්න මහතා මේ බව පැවැසීය.

දුම්කොළ සමාගම් විසින් තමයි නීති විරෝධි සිගරට් ලංකාවට ගෙනඒමට කටයුතු කරන්නේ. ඉන් පසු දුම්කොළ සමාගම විසින්ම ඔත්තුව ලබාදෙනවා. රට තුළ ජනමතයක් ඇති කරනවා නීති විරෝධී සිගරට් භාවිතය වැඩි වෙලා කියලා. මහා භාණ්ඩාරයේ සිටින ඇතැම් නිලධාරින් ද දුම්කොළ සමාගම වෙනුවෙන් අදහස් දක්වන බවද රාජිත සේනාරත්න ඇමතිවරයා කීවේය.

“දුම්බීම අවම කිරිම සදහා ලෝක සෞඛ්‍ය සංවිධානය නිර්දේශ කර ඇති ක්‍රියාමාර්ග 10 න් 09 ක්ම ශ්‍රී ලංකාව ක්‍රියාත්මක කර තිබෙනවා. දුම්වැටි සදහා සියයට 90 ක බදු පැනවීමේ දී විවිධ බලපෑම් එල්ල වුනා. මම සාකච්ඡා මාර්ගයෙන් විසදීමට පියවර ගත්තා. පෞද්ගලික අංශය සමග අමනාපයක් නැහැ. නමුත් පෞද්ගලික අංශයෙන් දුප්පත් ජනතාවට අගතියක් වෙනවා නම් ඊට විරුද්ධව නැගී සිටිනවා. දුම්වැටි භාවිතය අවම කිරිම සදහා ගත් ක්‍රියාමාර්ග හේතුවෙන් දුම්වැටි බිලියනයක් භාවිතයෙන් ඉවත් වී තිබෙනවා. නමුත් රට තුල මතයක් ඇති කරනවා දුම්වැටි වෙනුවට බීඩි භාවිතය වැඩි වී තිබෙනවා කියලා. එය බොරුවක්. නිකොටින් වලට ඇබ්බැහි වූ අයට බීඩි භාවිතා කරලා එම සන්තර්පනය ලබා ගත නොහැකි බවද ඇමති රාජිත සේනාරත්න මහතා කීවේය.

පැණිබීම සදහා වර්ණ සංකේත ක්‍රමයක් ආරම්භ කළේ ජනතාව දියවැඩියාවෙන් ආරක්ෂා කිරීමටයි. ඊටත් බලපෑම් එල් වුනා. නමුත් බලපෑම් වලට යටත් නොවී එම වැඩපිළිවෙල ඉදිරියට ගෙන යනවා. දින 52 ක දේශපාලන අර්බුදය සමයේ පැණිබීම සදහා පනවා තිබූ බදු ඉවත් කිරීමට පියවර ගත්තා. ඒ ඊනියා අග්‍රාමාත්‍යවරයාට සහනයක් ලැබෙන පරිදි. වාර්තා වන පරිදි රුපියල් බිලියන 04 ක මුදලක් පැණිබීම සමාගම් වලින් ලබාගෙන තිබෙනවා. නමුත් මම යළී සෞඛ්‍ය අමාත්‍යධූරයට පත් වූ පසු පැණිබීම බද්ද ක්‍රියාත්මක කළා. මෙහෙම තමයි දේශපාලන තීන්දු ගන්නේ. ඉදිරියට බලයට ආවොත් එවැනි තීන්දු තීරණ ගනියි. මැතිවරණ ජය පතා මුදල් ලබාගන්නවා. මටත් එහෙම මුදල් හම්බකරන්න තිබුනා. ඖෂධ වර්ග 73 ක මිල අඩු කර තිබෙනවා. එම නිසා ඖෂධ පරිහරණය වැඩි වී තිබෙනවා. ගුණාත්මක ඖෂධ භාවිතය වැඩි වී තිබෙනවා. ජාතික ඖෂධ නියාමන අධිකාරිය ජාත්‍යන්තර මට්ටමේ පවතින ඖෂධ වලට ඖෂධ ලබා දෙනවා. රජයක් ලෙස ඖෂධ සමාගම් නිෂ්පාදනය කරන ඖෂධ ජාත්‍යන්තර වෙළෙදපොලට යොමු කිරීමට අවශ්‍ය සියලුම සහයෝගය ලබාදෙන බවද රාජිත සේනාරත්න මහතා තවදුරටත් කීවේය.
Views
253
2019-01-20 03:14:19
කාලීන පුවත්