මෛත්‍රී සහ ගෝඨා ඝාතන සැලැස්මක් - පොලිස් පරීක්ෂණ ඇරඹේ


ජනාධිපති මෛත්‍රිපාල සිරිසේන මහතා සහ හිටපු ආරක්ෂක ලේකම් ගෝඨාභය රාජපක්ෂ මහතා ඝාතනය කිරීමේ කුමන්ත්‍රණයක් පිළිබද දූෂණ විරෝධී බලකාය නැමති සංවිධානය අද දින අනාවරණය කළේය.

මේ සම්බන්ධයෙන් එම සංවිධානය අද (13) පොලිස් කොමිසමට පැමිණිලි කළේය.

පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා මේ ගැන මාධ්‍යට සඳහන් කළේ දූෂණ විරෝධී බලකා සංවිධානය ඊයේ (12) සිදු කළ ප්‍රකාශය සම්බන්ධයෙන් විශේෂ පරීක්ෂණයක් සිදු කිරීමට පොලිස්පතිවරයා පොලිස් විශේෂ විමර්ශන ඒකකයට නියෝග කළ බවයි.

ත්‍රස්ත විමර්ශන කොට්ඨාශය භාර නියෝජ්‍ය පොලිස්පති නාලක ද සිල්වා මහතා සිදු කළ බව කියන දුරකථන සංවාද කිහිපයක් ඊයේ දූෂණ විරෝධී බලකාය නැමති සංවිධානය මාධ්‍ය හමුවේ හෙළි කළේය.

එම දුරකථන ඇමතුමෙන් දැක්වුනේ නියෝජ්‍ය පොලිස්පති නාලක ද සිල්වා මහතා දුරකථන සංවාදයේදී සඳහන් කරන්නේ අගමැතිවරයාට ලකුණු වැටෙන පරිදි සැලසුමක් සකස් කර අගමැතිවරයා උලුප්පා දක්වන ආකාරයෙන් කටයුතු කළ යුතු බවයි.

දුෂණ විරෝධී බලකායේ මෙහෙයුම් අධ්‍යක්ෂ නාමල් කුමාර මහතා සඳහන් කළේ නියෝජ්‍ය පොලිස්පති නාලක ද සිල්වා මහතා හඳුනාගන්නේ පොලිස්පති පූජිත ජයසුන්දර මහතා හරහා බවයි.

2020 වසරේදී වත්මන් ජනාධිපති මෛත්‍රීපාල සිරිසේන මහතා සහ හිටපු ආරක්ෂක ලේකම් ගෝඨාභය රාජපක්ෂ මහතා එක් වන බවත් බැරිම අවස්ථාවක් පැමිණියහොත් පාතාල නායයෙකු හරහා කළ යුතු දෙයක් සිදුකළ යුතු බව නියෝජ්‍ය පොලිස්පති නාලක ද සිල්වා මහතා ප්‍රකාශ කර තිබෙන බව කියති.


පොලිස් කොමිසමට පැමිණිල්ලක් කිරීමෙන් අනතුරුව දුෂණ විරෝධී බලකා මෙහෙයුම් අධ්‍යක්ෂක නාමල් කුමාර මහතා තම ආරක්ෂාව වෙනුවෙන් කොළඹ කොටුවේ පිහිටි අපරාධයක වින්දිතයන්ගේ සහ සාක්ෂිකරුවන්ගේ ආරක්ෂක පොලිස් කොට්ඨාසය වෙත පැමිණිල්ලක් ද ඉදිරිපත් කරනු ලැබීය.
Views
56
2018-09-13 13:11:38